26 Jun
សម្រាប់អ្នកដែលធ្វើដំណើរដោយរថយន្ដផ្ទាល់ នឹងមិនចាប់អារម្មណ៍នឹងតម្លៃឈ្នួលរថយន្ដ ឬហៅថាថ្លៃឡានក្រុងនោះទេ ។ ប៉ុន្ដែសម្រាប់ចូលចិត្ដធ្វើដំណើរដោយប្រើប្រាស់សេវាដឹកជញ្ជូនរបស់ក្រុមហ៊ុននឹងចាប់អារម្មណ៍នឹងបញ្ហានេះ ។
ខាងក្រោមជាតារាងសេវាកម្មដឹកជញ្ជូនអ្នកដំណើរចេញពីខេត្ដសុរិន្ទទៅខេត្ដក្រុងនានានៃប្រទេសថៃ ។ ក្នុងនោះគេប្រាប់ពីឈ្មោះក្រុមហ៊ុនដឹកជញ្ជូន ម៉ោងចេញដំណើរ រយៈពេលធ្វើដំណើរ និងតម្លៃ ។ ក្រុមហ៊ុនដឹកជញ្ជូននីមួយកម្រនឹងធ្វើខុសអំពីសេចក្ដីដូចចែងក្នុងតារាងនេះណាស់ ។ ទាំងពេលវេលាចេញដំណើរ ពិសេសតម្លៃសេវាកម្ម ។
2 May
មូសគឺជាភ្នាក់ងារចម្លងជំងឺ មានជាអាទិ ជំងឺគ្រុនឈាម ជំងឺគ្រុនចាញ់ជាដើម ។ មូសខ្លាញីគឺជាភ្នាក់ងារចម្លងមេរោគ គ្រុនឈាម ។ ដើម្បីជាចំណែកមួយនៃការកម្ចាត់មូសខ្លា ថៃនឹងព្រលែងមូសឈ្មោលដែលជាមូសអារនៅតំបន់មួយចំនួនក្នុងខេត្ដ ឆាក់ឈើងសៅ (ខេត្ដស្ទឹងជ្រៅ) នៅបំណាច់ខែឧសភានេះ ។ មូសទាំងនេះត្រូវបានបង្កាត់ដោយមហាវិទ្យាល័យវិទ្យាសាស្ត្រនៃសាកលវិទ្យាល័យមហិឌុន ។ គេមានគម្រោងបង្កើតរោងចក្រផលិតមូសអារដើម្បីលក់ចេញទៅក្រៅប្រទេសទៀតផង ។
8 Apr
រឿងរ៉ាវជីវិតដែលតែងតែកើតឡើងចំពោះក្រុមគ្រួសារដ៏តូចមួយនេះ ពេលខ្លះប្រៀបដូចជារឿងនិទាន ឯពេលខ្លះទៀតក៏ប្រៀបដូចជា ការផ្សងព្រេងនៅលើពិភពដ៏សែនធំ ដែលតែងតែផ្តល់នូវបទពិសោធន៍ប្លែក ៗ គ្នាគ្រប់ពេលវេលា ។ អរគុណសម្រាប់ពេលវេលា និង មេរៀនជីវិតដែលធ្វើឲ្យខ្ញុំក្លាយជាមនុស្សម្នាក់ដែលរឹងមាំជាងមុន អរគុណចំពោះក្រុមគ្រួសារដ៏តូចមួយនេះ ដែលតែងតែផ្តល់នូវក្តីសង្ឃឹម និង ស្នាមញញឹមគ្រប់ពេលដែលមានបញ្ហា ។
ឆ្នាំណាក៏ដូចជាឆ្នាំណាដែរ ឲ្យតែខែមេសាមកដល់ ក្រុមគ្រួសារដ៏តូចមួយនេះ តែងតែមានគម្រោងត្រឡប់ទៅផ្ទះ ដោយរាប់ថ្ងៃថយក្រោយជានិច្ច…….។
ឆ្នាំនេះកូននីតា ហាក់ដូចជារសាប់រសល់ខុសពីឆ្នាំមុន ៗ កូនព្យាយាមសួរម៉ាក់ថា
– តើយើងត្រឡប់ទៅផ្ទះវិញថ្ងៃណា ?
– ទៅទាន់ថ្ងៃខួបកំណើតកូនទេ ? ហើយមានអ្វីពិសេសសម្រាប់កូនទេឆ្នាំនេះ ព្រោះកូនអាយុ ១២ ឆ្នាំហើយ ម៉ាក់ដឹងទេថា ឆ្នាំនេះជាឆ្នាំវក ត្រូវនឹងឆ្នាំកូនកើតតែម្តង ឯថ្ងៃវិញក៏ចំថ្ងៃអាទិត្យដូចគ្នាទៀត ហើយចុះកូនកើតម៉ោងប៉ុន្មានដែរ ? ហើយកាលពីម៉ាក់នៅក្មេង ៗនោះ ម៉ាក់មានរៀបចំថ្ងៃកំណើតទេ ?
– ឆ្នាំនេះកូនចង់ទៅធ្វើបុណ្យនៅវត្ត យកចង្ហាន់ទៅវត្ត ទៅជូនយាយ និង ម៉ា ហើយចាំល្ងាចចាំរៀបចំនៅផ្ទះបានអត់ម៉ាក់ ?
– ហើយឆ្នាំនេះមានអ្នកធ្វើឲ្យកូនភ្ញាក់ផ្អើលទៀតទេ (ទោះបីជាដឹងថាឆ្នាំណាក៏ប៉ាម៉ាក់រៀបចំពិធីឆ្លងខួបកំណើតឲ្យកូនដែរ ទោះបីជាពិធីតូច ៗ ក៏ដោយចុះ) តែអ្វីដែលធ្វើឲ្យកូន រំភើបនឹងរង់ចាំថ្ងៃនោះជានិច្ចនោះ គឺពួកយើងតែងតែផ្លាស់ប្តូរស្ទីលនៃការរៀបចំដោយមិនឲ្យម្ចាស់ខ្លួនដឹងមុន ។
ការចង់ដឹងរបស់កូន ពិតជាធ្វើឲ្យម៉ាក់ពិបាកឆ្លើយណាស់ ព្រោះថ្ងៃស្អែកនេះ ក៏ត្រូវជាថ្ងៃទី ៩ ទៅហើយ ថ្វីត្បិតតែជាថ្ងៃសម្រាកក៏ពិតមែន តែម៉ាក់ត្រូវនាំកូននេត្រទៅបង្ហាញខ្លួននៅសាលាថ្មី (អនុវិទ្យាល័យប្រាសាទវិទ្យាគារដែលជាសាលាដែលកូននេត្រប្រឡងជាប់ចំណាត់ថា្នក់ទី ២១ ក្នុងចំណោមអ្នកជាប់ទាំងអស់ ២៤០នាក់ ស្ថិតក្នុងលក្ខខ័ណ្ឌការប្រឡងប្រជែង និងក្រៅក្របខ័ណ្ឌដោយមានបេក្ខជនដែលចូលរួមប្រឡងទាំងអស់ចំនួន ៦០០ នាក់) បើមិនបានទៅបង្ហាញខ្លួនទេនោះ មានន័យថាយើងលះបង់សិទ្ធរបស់យើងនៅសាលានេះ ។ ឯថ្ងៃអាទិត្យក៏ជាថ្ងៃខួបកំណើតកូន ៗទៅហើយ តែម៉ាក់សន្យាថា ម៉ាក់នឹងព្យាយាមរៀបចំគម្រោងឲ្យកូនទាំងពីរឲ្យបានល្អបំផុត ។
កូនទាំងពីរគឺជាកែវភ្នែករបស់ប៉ា និង ម៉ាក់ ។ ប៉ាម៉ាក់ស្រឡាញ់កូន ។
សង្ឃឹមថា ថ្ងៃណាមួយ កូនៗ នឹងបានចូលមកអានក្នុងប្លកមួយនេះ…
ឆ្នាំនេះកូនស្រីពៅរបស់យើងអាយុ ១២ ឆ្នាំហើយ ។
28 Mar
សូមជម្រាបសួរ បងប្អូនអ្នកភូមិយើងជាថ្មីម្តងទៀត បន្ទាប់ពីស្ងាត់បាត់មុខបាត់មាត់អស់ជាច្រើនឆ្នាំមកហើយនេះ ថ្ងៃនេះទើបដឹងខ្លួនថា ខ្លួនឯងមានផ្ទះមួយខ្នងនឹងគេដែរនៅភូមិវើដប្រេសនេះ !!!!
ថ្ងៃនេះសូមមកកែខ្លួន ហើយសន្យាថានឹងឧស្សាហ៍មកបោសពីងពាង សំរាមហើយថែទាំឲ្យបានដិតដល់ដូចពីមុនអញ្ចឹង តែមកពេលទំនេរទេណា!!!!!
បន្ទាប់ពីមករស់នៅក្នុងស្រុកសុរិន្រ្ទ អ្នកស្រុកដែលរស់នៅក្នុងខេត្តសុរិន្រ្ទ ភាគច្រើនពួកគាត់និយាយភាសាខ្មែរ ភាសាឡាវ និង ថៃ ។ តែសម្រាប់ក្មេង ៗជំនាន់ក្រោយវិញ ពួកគេស្តាប់បាន តែមិនមែនទាំងអស់នោះទេ ។ ដូច្នេះភាសាដែលពួកគាត់ប្រើប្រាស់ប្រចាំថ្ងៃនោះគឺច្របល់ចូលគ្នា មានទាំងភាសាថៃ ឡាវ និងខ្មែរផងដែរ មនុស្សចាស់និយាយខ្មែរជាមួយកូនចៅ តែនៅពេលដែលកូនចៅឆ្លើយតបវិញគឺ មានលាយគ្នារវាងពាក្យថៃនឹងខ្មែរ ឬ អាចជាភាសាថៃសុទ្ធតែម្តង ។ តែក្មេង ៗស្តាប់បានយល់ន័យ តែនិយាយមិនបាន ។
ក្នុងខែមីនា មេសានេះជាពេលវ៉ាកង ខាងសាលាបានរៀបចំកាលវិភាគឲ្យរូបខ្ញុំចេញទៅបង្រៀននៅសាលារៀននិគមសាងតុនឯងប្រាសាទ ព្រោះខាងសាលាមានបំណងចង់ឲ្យសិសស្សចេះអាន និង សរសេរភាសាខ្មែរបាន ហើយក៏ដើម្បីជាទុនដល់ក្មេងជំនាន់ក្មេង និង ជាការអភិរក្សភាសាខ្មែរផងដែរ ។
សាលារៀននិគមសាងតុនឯងប្រាសាទស្ថិតក្នុងឃុំប្រាសាទ ស្រុកបា្រសាទ ខេត្តសុរិន្រ្ទ ។ 
16 Oct
ភាពស្រស់ស្អាតជាគូនិងស្រ្តី ។ តែដើម្បីទទួលបាននូវភាពស្រស់ស្អាត និង ការទាក់ទាញទាំងនោះ តើស្រ្តីគួរត្រូវស្វែងយល់ពីអ្វីខ្លះទៅ ?
ខាងក្រោមនេះជាការបង្ហាញពីរបៀបធ្វើសក់រួញដោយខ្លួនឯង ដោយម៉ាស៊ីនមូរសក់ និង កៀបសក់។ សង្ឃឹមថាបងប្អូននិងចូលចិត្តដូចជាខ្ញុំដែរ
16 Sep
ជីវិតប្រៀបដូចជាខ្សែទឹកដែលហូរ ដោយគ្មានថ្ងៃត្រឡប់មកវិញ ។ ពេលវេលាតែងផ្លាស់ប្តូរពីវិនាទីមួយទៅវិនាទីមួយ រឿងហេតុជាច្រើនបានឆ្លងកាត់ ហើយក៏រលប់បាត់ទៅវិញដោយឯកឯង ដោយមិនបាច់បង្ខំ តែក៏មានរឿងជាច្រើនទៀតដែលស្ថិតនៅដក់ជាប់នៅនឹងអារម្មណ៍ទោះជាចង់បំភ្លេចក៏ភ្លេចមិនបាន
បំណងប្រាថ្នាដ៏ធំបំផុតរបស់ស្រ្តីមេផ្ទះគ្រប់រូបគឺ មានគ្រួសារដែលចេះយល់ចិត្តគ្នាទៅវិញទៅមក ការសន្តោសប្រណី និង ការអធ្យាស្រ័យរវាងគ្នា និង គ្នា ។
ថ្ងៃកំណើតគ្រាន់តែជាការកំណត់អាយុរបស់មនុស្សម្នាក់ ៗ ប៉ុណ្ណោះ អ្វីដែលសំខាន់សម្រាប់ខ្ញុំគឺ ការរស់នៅជុំគ្នា និង ការរួមដំណើរជាមួយគ្នាប្រកបទៅដោយភាពរីករាយ ។
អរគុណបង កូនសម្លាញ់ទាំងពីរដែលតែងតែកំដរពេលវេលាទាំងនេះ ឲ្យឆ្លងផុតដោយក្តីសប្បាយរីករាយ និង ពោរពេញដោយសុភមង្គល ។ ជាពិសេសគឺការផ្តល់នូវក្តីស្រឡាញ់ និង ភាពកក់ក្តៅដល់ក្រុមគ្រួសារជានិច្ច ។
10 Sep
ប័ណ្ណបើកបរនឹងផុតកំណត់នៅថ្ងៃទី ២៣ កញ្ញា នេះទៅហើយ តើខ្ញុំត្រូវធ្វើដូចម្តេចទៅដើម្បីសូមបន្តទៅទៀតបាន? គិតចុះគិតឡើង ក៏នឹកឃើញដល់លោកគ្រូហ្គូហ្គល ខ្ញុំក៏ប្រញាប់រត់ទៅសួរគាត់ភ្លាម ។ ចម្លើយជាច្រើនបានលេចឡើងលើក្តារខៀនរបស់លោកគ្រូហ្គូហ្គល ខ្ញុំព្យាយាមជ្រើសរើសចម្លើយដែលត្រូវនឹងប្រធានបទរបស់ខ្ញុំបំផុត ។ ឆែកចុះឆែកឡើង ក៏មិនប្រទះនឹងចម្លើយដែលខ្ញុំត្រូវការសោះ ភាគច្រើនគឺទាក់ទងតែនឹងការជនជាតិថៃប៉ុណ្ណោះ ការដែលពិបាកដូច្នេះព្រោះថាការពីឆ្នាំមុននោះជាគម្រោងការណ៍របស់វិទ្យាស្ថាន រួមជាមួយនឹងក្រសួងគមនាគមន៍ និង ដឹកជញ្ជូនផ្លូវគោក ដើម្បីជាការសម្រួលដល់សិស្ស និស្សិតដែលរៀននៅក្នុងវិទ្យាស្ថានឲ្យមានប័ណ្ណបើកបរឲ្យបានគ្រប់គ្នា ។ ដូច្នេះហើយឯកសារគ្រប់បែបយ៉ាងគឺខាងវិទ្យាស្ថាន ជាអ្នករៀបចំឲ្យទាំងអស់ ។
មុននឹងទទួលបានប័ណ្ណបើកបរ គឺត្រូវតែចូលរួមអប់រំអំពីច្បាប់ចរាចរណ៍មួយថ្ងៃពេញ ឯថ្ងៃទី ២ត្រូវទៅប្រឡង មានវិញ្ញាសារដូចជា វិញ្ញាសារសរសេរ (ជ្រើសរើសចម្លើយក្នុងកុំព្យូទ័រ ៤០ សំណួរ) ប្រឡងបើកបរដោយម៉ាស៊ីនដែលបានកំណត់ វាស់ខ្សែភ្នែក (ប្រាប់ព័ណ៌ទៅតាមការចង្អុលរបស់មេប្រយោគ) និង ចុងក្រោយគឺប្រឡងបើកបរដោយផ្ទាល់នៅលើកំណាត់ផ្លូវដែលបានកំណត់នៅក្នុងក្រសួង ។ បន្ទាប់ពីចប់សព្វគ្រប់ហើយនោះ គឺនឹងទទួលបាននូវប័ណ្ណបើកបររយៈពេលមួយឆ្នាំ ឬ អាចហៅម្យ៉ាងទៀតបានថា ប័ណ្ណបើកបរបណ្តោះអាសន្ន ហើយនឹងត្រូវទៅបន្តយកប័ណ្ណបើកបរលើកទី ២ មានសុពលភាព ៥ ឆ្នាំ ។ ការបន្តប័ណ្ណបើកបរលើកទី ២ នេះអាចទៅសូមមុនពេលដែលប័ណ្ណចាស់ផុតកំណត់រយៈពេលពីរខែ ដោយគ្រាន់តែទៅប្រឡងបើកបរនឹងម៉ាស៊ីនដែលបានកំណត់ ព្រមទាំងវាស់ខ្សែភ្នែក ។
ចុងបញ្ចប់ខ្ញុំក៏សម្រេចយកឯកសារដែលខ្ញុំមានទៅសាកមើលសិន តែខ្វះម្យ៉ាងគឺ ឯកសារបញ្ជាក់ពីកន្លែងធ្វើការ ។ រត់ចុះរត់ឡើងពីរ បីថ្ងៃ ចុងក្រោយក៏បានទទួលប័ណ្ណបើកបរលើកទីពីរ ដែលមានសុពលភាព ៥ ឆ្នាំ ។ ស្នាមញញឹម ការទទួលរាក់ទាក់ ពីមន្រ្តីរាជការក្រសួងគមនាគមន៍ សាខាប្រាសាទ ខេត្តសុរិន្រ្ទ បានដក់ជាប់ក្នុងអារម្មណ៍ខ្ញុំជានិច្ច ។ ខ្ញុំសង្ឃឹមថា ថ្ងៃណាមួយខ្ញុំនឹងបានឃើញមន្រ្តីរាជការប្រទេសរបស់យើងមានទឹកមុខដូចជាពួកគាត់នាពេលនេះដែរ ។ តែអ្វីដែលស្តាយនោះគឺ ប័ណ្ណបើកបរលើកទី ១ គេអត់ឲ្យវិញទេ ស្តាយដែលមិនបានថតរូបទុកជាឯកសារ ។
ឯកសារភ្ជាប់ ដើម្បីសូមបន្តមានដូចជា
– អត្តសញ្ញាណប័ណ្ណ ឬ លិខិតឆ្លងដែន (ថតចម្លងឯកសារ ដែលមានដូចជាទិដ្ឋាការ និង ប័ណ្ណចេញចូលប្រទេសថៃ)
– លិខិតបញ្ជាក់ពីកន្លែងធ្វើការ
– ប័ណ្ណបើកបរ (មិនទាន់ផុតអាយុ)
– សំបុត្របញ្ជាក់សុខភាព (សំបុត្រពេទ្យ)
– ប័ណ្ណគ្រួសារ (លិខិតបញ្ជាក់ទីលំនៅ)
– លុយ ៣៥៥ បាទ (៥ ឆ្នាំ ២៥០ បាទ រួមជាមួយនឹងថ្លៃកាតបូកថតរូប ១០០ បាទ ពាក្យសូម ៥ បាទ )
4 Aug
មួយរយៈនេះពិតជាស្ងាត់សម្បើមណាស់ ព្រោះតែម្ចាស់ផ្ទះរវល់ តែអ្វីដែលសំខាន់ហើយជាបញ្ហានោះគឺ ម្ចាស់ផ្ទះក្លាយជាមនុស្សខ្ជិលរលួយ (រកមនុស្សមកប្រដូចមិនបានឡើយ) ។
ថ្ងៃនេះសូមលើកយកអត្ថបទរបស់ពូជអង្គរ មកផ្សាយឡើងវិញ
សូមអរគុណម្ចាស់ប្លកពូជអង្គរដែលបានសរសេររួចជាស្រេច អត្ថបទទាំងស្រុងពីពូជអង្គរ
http://www.puc-angkor.blogspot.com/2014/07/blog-post.html
ពីថ្ងៃទី ២៥ ដល់ ២៦ ខែកក្កដា ឆ្នាំ ២០១៤ វគ្គបំពាក់បំប៉នការផលិតកម្មវិធីបង្រៀន បានធ្វើឡើង ដោយមានការចូលរួមពីលោកគ្រូអ្នកគ្រូចំនួន ២០ នាក់ មកពី ២០ សាលារៀនភូមិភាគឦសាន ។ ក្រៅពីការផ្តោតជាសំខាន់ទៅលើការផលិតកម្មវិធីសិក្សាប្រកបដោយស្តង់ដារ និងវិធីសាស្ត្របង្រៀនភាសាខ្មែរសម្រាប់ជនបរទេស សិក្ខាកាមបានទទួលការបញ្ជ្រាបអំពីសំណេរភាសាខ្មែរតាមគោលការណ៍គណៈកម្មការជាតិភាសាខ្មែរ ៖ ព្យាង្គតម្រួត ស្រៈពេញតួ និង ការប្រើពុម្ពអក្សរខ្មែរ Khmer OS Siemreap
14 Jun
ជារៀងរាល់ថ្ងៃសុក្រ ខ្ញុំមានឱកាសបានចេញទៅបំពេញបេសកម្មនៅខាងក្រៅសាលា ដោយគោលដៅរបស់ខ្ញុំគឺទៅកាន់ស្រុកកាប់ជើងដែលមានចម្ងាយប្រហែល ៤០ គីឡូម៉ែត្រពីកន្លែងដែលខ្ញុំធ្វើការ និង ១៤ គីឡូម៉ែត្រពីព្រំដែនថៃ ខ្មែរ (ច្រកអូស្មាច់) ។
ដោយមានពាក្យចចាមអារ៉ាម និង ពត៌មានជាច្រើនទាក់ទងទៅនឹងកម្មករខ្មែរ ដែលចូលមកដោយខុសច្បាប់នៅក្នុងស្រុកថៃនេះ ខ្ញុំបានដាក់កាម៉ារ៉ានៅក្នុងកាបូប ហើយគិតក្នុងចិត្តថា ខ្ញុំនឹងផ្តិតយករូបភាពដែលខ្ញុំបានឃើញនោះមកផ្ញើជូនបងប្អូនអ្នកភូមិរបស់យើង ។
ខ្ញុំបានចាកចេញពីកន្លែងធ្វើការនៅម៉ោងប្រហែលជា ១១ ថ្ងៃត្រង់ ហើយធ្វើដំណើរឆ្ពោះទៅកាន់សាលាស្រុកកាប់ជើង ។ នៅតាមដងផ្លូវបរិយាកាសដូចធម្មតាហាក់ដូចជាមិនមានប្រែប្រួល ឬ គួរឲ្យចាប់អារម្មណ៍សោះ តែពេលមកដល់ចំណុចឆែកឆេរ (ដែលឆែកឆេរដោយទាហានថៃ) មុននឹងបានមកដល់ទីរួមស្រុកប្រាសាទនោះ បរិយាកាសដែលខ្ញុំគិតថាធម្មតានោះបានប្រាសចាកពីអារម្មណ៍ទាំងស្រុងរបស់ខ្ញុំ ខ្ញុំក្រឡេកមើលទៅខាងឆ្វេងដៃ ឃើញមានមនុស្សណែនតាន់តាប់ មានអ្នកខ្លះ អង្គុយ អ្នកខ្លះឈរ ខ្លះដេក …។ សំឡេងក្មេងយំបានលាន់ឡើង ខ្ញុំចុចកញ្ចក់ឲ្យចុះ ហើយសម្លឹងមើលពួកគាត់ដោយក្តីរន្ធត់បំផុត ។
នេះហើយជីវិត!!!!!!!!! ជីវិតដែលមានតែភាពតោកយ៉ាក ជីវិតដែលកើ់តមកដើម្បីតែមកធ្វើខ្ញុំគេបែបនេះមែនទេ ????? កើតមកមួយជាតិនឹងគេដែរ ហេតុអ្វីបានជាមិនឲ្យពួកគាត់រស់នៅសុខសប្បាយដូចដទៃខ្លះទៅ ? ……………….
យើងក៏បន្តដំណើរចេញផុតពីទិដ្ឋភាពដ៏អាប់អួរនោះ ហើយក៏ធ្វើដំណើរឆ្ពោះទៅកាន់គោលដៅរបស់យើង ហើយបំពេញការងាររហូតទាល់តែដល់ម៉ោងកំណត់ ។ ម៉ោងប្រហែលជា ៣.៣០ ភ្លៀងក៏ចាប់បង្អុរមកខ្លាំងឡើង ៗ រហូតដល់ម៉ោងដែលយើងត្រូវត្រឡប់ទៅហើយ នៅតែមិនទាន់រាំង ហើយគ្រាប់កាន់តែធំឡើង ៗ ។ តែគ្រាប់ភ្លៀងមិនអាចឃាត់ឃាំងដំណើរត្រឡប់របស់យើងបានទេ ។ យើងចាកចេញពីទីរួមស្រុកកាប់ជើង ដោយកាត់គ្រាប់ភ្លៀង និង រន្ទះផូងផាំងដោយមិនញញើត។ ចេញមកបានបន្តិច យើងក៏បានជួបនឹងឡានទាហានប្រាំ ប្រាំមួយឡានដែលមានដឹកកម្មករខ្មែរពេញ ៗ ឡាន ។ ឡានដែលពួកគាត់ជិះនោះគ្មានដំបូលសម្រាប់ជ្រកនោះទេ តែទឹកមុខរបស់ពួកគាត់ស្រស់ស្រាយ និងពោរពេញទៅដោយក្តីសង្ឃឹម ព្រោះយ៉ាងហោចណាស់គាត់ក៏បានត្រឡប់មកផ្ទះវិញ ……….។ សូមជូនពរឲ្យពួកគាត់ទាំងអស់គ្នាមានសំណាងល្អក្នុងជីវិត ។
មកដល់ចំណុចឆែកឆេរវិញ ស្រាប់តែឃើញមានឡានក្រុងបីចតនៅខាងមុខនោះ ហើយកម្មករខ្មែរដទៃទៀតក៏មកជំនួសកន្លែងអ្នកដែលនៅពីព្រឹក ……….។
សូមអានបន្ថែម
30 May
Moral Camp គឺជាពាក្យដែលគេហៅជាភាសាអង់គ្លេស សម្រាប់ភាសាខ្មែរយើងមិនដឹងជាត្រូវប្រើពាក្យយ៉ាងម៉េច ដើម្បីឲ្យស្តាប់ទៅពាក្យពិរោះនោះទេ ដូច្នេះខ្ញុំសូមមិនប្រែពាក្យនេះទេ តែសូមជំនួយពីបងប្អូនអ្នកភូមិយើងវិញ ។
Moral Camp គឺជាការបោះជម្រំរបស់សិស្សានុសិស្ស ដែលទើបនឹងចូលមកកាន់វិទ្យាស្ថានថ្មី ៗ ពោលគឺសម្រាប់សិស្សឆ្នាំទី ១ ។ បើតាមដឹងគឺនៅស្រុកថៃចំពោះគម្រោងការណ៍នេះគឺមាននៅគ្រប់សាលារៀន នឹងមានថវិកាសម្រាប់រៀបចំគម្រោងការណ៍នេះជារៀងរាល់ឆ្នាំផងដែរ ។ ចំពោះគម្រោងការណ៍បែបនេះមិនដឹងជាស្រុកយើងមានហើយឬនៅទេ ?
សម្រាប់ Moral Camp នៅវិទ្យាស្ថានបណ្តុះបណ្តាលវិជ្ជាជីវៈប្រាសាទនាឆ្នាំនេះ គឺចាប់ផ្តើមគម្រោងការណ៍របស់ខ្លួន ពីថ្ងៃសុក្រ ទី ៣០ ខែ ឧសភា រហូតដល់ ថ្ងៃទី ១ ខែមិថុនា ឆ្នាំ ២០១៤ ។ ដោយការចាប់ថ្តើមគម្រោងការណ៍នេះ ត្រូវនឹងសប្តាហ៍ទី ២ នៃឆមាសទី១ ដែលរួមមានទាំងអស់ ១៨ សប្តាហ៍ សម្រាប់ឆមាសទី ១នេះ ។ គម្រោងការណ៍អប់រំគុណធម៌ នាឆ្នាំនេះបានរៀបចំធ្វើនៅវត្តអមរិន្រ្ទារាម ដោយគោលបំណងនៃការរៀបចំគម្រោងការណ៍នេះ គឺដើម្បីបង្វឹកចិត្តសិស្សានុសិស្ស ឲ្យមានភាពអត់ធ្មត់ តស៊ូ គោរពពេលវេលា មានភាពម្ចាស់ការលើខ្លួនឯង និងជាពិសេសនោះគឺដើម្បីពង្រឹងចំណងមិត្តភាពជាមួយមិត្តភក្តិរួមជំនាន់ ។ ការចូលរួមគម្រោងការណ៍នេះ សិស្សានុសិស្សទាំងអស់ត្រូវត្រៀមសម្ភារៈសម្រាប់ប្រើប្រាស់ផ្ទាល់ខ្លួន និង សម្លៀកបំពាក់សម្រាប់ផ្លាស់ប្តូរចំនួន ៣ ថ្ងៃ ២ យប់ ព្រមទាំងថ្នាំ សម្រាប់អ្នកដែលមានជម្ងឺប្រចាំកាយ តែសម្រាប់អ្នកដែលមិនមានជម្ងឺប្រចាំកាយ គឺខាងសាលាមាន រៀបចំកញ្ចប់ថ្នាំសម្រាប់បឋមព្យាបាលផងដែរ ។ ការចូលរួមសកម្មភាពរបស់សាលានេះ សិស្សមិនបានចំណាយលុយ សូម្បីតែមួយកាក់មួយសេនឡើយ ខាងសាលាមានរៀបចំអាហារបីពេល ព្រមទាំងអាហារសម្រន់ និង ភេសជ្ជៈ ២ ពេល ។
អ្នកដែលចូលរួមទាំងអស់ត្រូវអង្គុយស្តាប់ពាក្យទូន្មានប្រៀនប្រដៅរបស់វាលគ្មិន និង ព្រះសង្ឃ ។ ដោយមានទាំងវិធីតាំងសមាធិ ការធ្វើចិត្តឲ្យស្ងប់ និង ការរម្ងាប់ចិត្តចំពោះ រឿងហេតុដែលកើតមានឡើងចំពោះយើងទៀតផង ។
សម្រាប់ម្ចាស់ផ្ទះ មិនបានទៅចូលរួមឲ្យចប់ចុងចប់ដើមនោះទេ គឺឆ្លៀតពេលទំនេរថ្ងៃត្រង់ប្រហែលជា ២ ម៉ោង ទៅជាមួយលោកស្រីនាយិកា ហើយក៏ត្រឡប់មកវិទ្យាស្ថានវិញ ។ តែក៏មានអារម្មណ៍សប្បាយចិត្ត នៅពេលដែលឃើញក្មេង ៗ ទាំងនោះមានទឹកមុខរីករាយ និងបង្ហាញនូវការរាក់ទាក់នៅពេលដែលបានឃើញគ្រូគេទៅដល់ ។ សូមបញ្ជាក់ថា សិស្សានុសិស្សដែលទៅចូលរួមនេះ មានចំនួន ប្រហែលជា ៥៤០ នាក់ ។
vsthea 
មតិ