ទិដ្ឋភាពខ្លះ ៗ មុខមហាវិទ្យាល័យអក្សរសាស្ដ្រនិងសង្គមសាស្ដ្រ នៅក្រៅសាលពិធីចែកសញ្ញាប័ត្រ នាថ្ងៃ ២១.១២.២០១១ ។
Archive for December, 2011
18 Dec
ជប់លៀងជូនពរនិស្សិត
ឆ្នាំសិក្សា២០១១នេះនៅសាកលវិទ្យាល័យមហាសារខាមមាននិស្សិតដែលបានបញ្ចប់ការសិក្សាថ្នាក់បណ្ឌិត អនុបណ្ឌិត និង បរិញ្ញាប័ត្ររួមទាំងអស់មានចំនួន៨ ៤២០នាក់ ។ ក្នុងនោះមាននិស្សិតបរិញ្ញាប័ត្រភាសាខ្មែរ ចំនួន ១០នាក់ផងដែរ ។
ពិធីប្រគល់សញ្ញាប័ត្រមានប្រារព្ធធ្វើឡើងជារៀងរាល់ឆ្នាំក្រោមអធិបតីដ៏ខ្ពង់ខ្ពស់របស់ម្ចាស់ក្សត្រីយ៍ សុរិន្ទថន ។ នាឆ្នាំនេះពិធីនេះនឹងប្រារព្ធធ្វើឡើងនាថ្ងៃទី ២១ ខែធ្នូ ឆ្នាំ ២០១១ ។
មុននឺងថ្ងៃទទួលសញ្ញាប័ត្របានមកដល់និស្សិតគ្រប់រូបត្រូវចូលរួមក្នុងពិធីហ្វឹកសមជាមុនសិន ដែលមានរយៈពេល៣ថ្ងៃពេញ ដោយចាប់ផ្តើមពីថ្ងៃទី ១៧-១៩ ខែធ្នូ ឆ្នាំ២០១១ ។ ថ្ងៃទីមួយ និង ថ្ងៃទីពីរនិស្សិតត្រូវស្លៀកពាក់ឯកសណា្ឋនជានិស្សិត និងសមនៅតាមមហាវិទ្យាល័យរៀងៗខ្លួន ។ សម្រាប់ថ្ងៃទីបី និស្សិតត្រូវមកសមជុំគ្នានៅអាគារប្រារព្ធពិធី ដោយតម្រូវឲ្យនិស្សិតតុបតែងមុខធ្វើសក់ ព្រមទាំងស្លៀកសម្លៀកបំពាក់ដែលត្រូវទទួលសញ្ញាប័ត្រ ថ្ងៃទីបីនេះគេធ្វើដូចជាថ្ងៃប្រគល់មែនទែនអញ្ចឹងគ្រាន់តែថាមិនមានវត្តមានម្ចាស់ក្សត្រីយ៍សុរិន្ទថនតែប៉ុណ្ណោះ ។ សម្រាប់ថ្ងៃទី ២០ គឺគេទុកពេលឲ្យនិស្សិតសម្រាកយកកម្លាំង ដើម្បីចូលរួមពិធីធំនាថ្ងៃស្អែក ។
នៅតាមមហាវិទ្យាល័យនីមួយ ៗ មានរៀបចំពិធីជប់លៀងអបអរនិស្សិតដែលទើបបញ្ចប់ការសិក្សាថ្មី ៗ ព្រមទាំងមានតាំងលម្អផ្កាចម្រុះព័ណ៌ ដើម្បីទុកឲ្យនិស្សិតថតរូបជាមួយក្រុមគ្រួសារ និងមិត្តភក្តិទុកជាអនុស្សាវរីយ៍ ។
12 Dec
កីឡាពណ៌ กีฬาสี Color Sport
กีฬาสี ម្ចាស់ផ្ទះសូមប្រែថាជាខ្មែរថា កីឡាពណ៌ និងអង់គ្លេសថា Color Sport សិនចុះ ហើយរង់ការតម្រូវពីអ្នកភូមិវើតប្រេសក៏ដូចជាពីប្រិយមិត្ដទាំងអស់ ។
ការប្រកួតកីឡាពណ៌ (กีฬาสี) ឃើញមានការរៀបចំស្ទើរគ្រប់សាលារៀននៃប្រទេសថៃ ។ នៅក្នុង ពិធីនេះ គេបែងសិស្សដែលចូលប្រកួតទៅតាមពណ៌ ជាអាទិ៖ ក្រហម លឿង ជំពូ …។ វិញ្ញាសានៃការប្រកួតអាស្រ័យទៅតាមទីកន្លែងដែលចាត់ ដូចជា៖ រត់ប្រណាំង, ។ គោលដៅ នៃ រៀបចំកម្មវិធី គឺពង្រឹងភាពស្និទ្ធស្នាលរវាងសិស្សនិងសិស្ស, សាមគ្គីភាព… ។ សិស្សអាចស្គាល់គ្នា ទទួលមិត្តភក្ដិថ្មីៗបន្ថែមទៀត ចំណែកសាមគ្គីភាព សិស្សមានការជួយគ្នាពិសេសនៅក្នុងក្រុម ។ យើងប្រហែលជាធ្លាប់ឃើញអ្នកស្រែកផ្ដល់កម្លាំងចិត្ដដែលភាសាអង់គ្លេសហៅថា Cheer Leader ។ ក្នុងពេលសមាជិកពណ៌នៃក្រុមចូលប្រកួត ពួកក្រុមអ្នកផ្ដល់កម្លាំងចិត្ដនឹងស្រែកបន្ទរគាំទ្រដល់កីឡាករនៃក្រុមរបស់ខ្លួនឲ្យប្រឹងឡើង ។ កម្មវិធីអាចចាត់ទុកជាការជួបជុំរវាងមាតាបិតាអាណាព្យាបាលសិស្សានុសិស្សផងដែរ ព្រោះកូនសិស្សដែលចូលរួមភាគច្រើនជាក្មេងសិស្សសាលាតាំងពីថ្នាក់ត្រៀមបឋមរហូតដល់ថ្នាក់ទី ៦ ។ ប្រការសំខាន់មួយទៀត គេឆ្លៀតបញ្ជ្រាបការណែនាំកូនចៅរបស់គេឲ្យស្គាល់អំពីប្រពៃណីនៃការតុបតែងកាយរបស់ជាតិគេនៅតាមតំបន់នានានៃប្រទេស ។ ក្រៅពីក្រុមពណ៌ នៅមានក្រុមសិស្សដែលស្លៀកពាក់សម្លៀកបំពាក់ប្រចាំតំបន់របស់ប្រទេស សម្លៀកបំពាក់ប្រពៃណីរបស់គេជាដើម ។ ក្រុមសិស្សទាំងអស់ត្រូវបានគេចាត់ទៅតាមលំដាប់នៅក្នុងក្បួនព្យុហយាត្រា (Parade) ។
នៅរាល់ឆ្នាំសាលាកិត្ដិយា (โรงเรียนอนุบาลกิติยา) ដែលមានទីតាំងនៅទីរួមខេត្ដមហាសារខាមនិងជាសាលាឯកជនមួយក្នុងចំណោមសាលាឯកជននានរបស់ខេត្ដតែងចាត់ពិធីនេះឡើង នាខែធ្នូ ។ ឆ្នាំនេះគេចាត់ពិធីនៅថ្ងៃទី ១០ ខែធ្នូ ។ កូនស្រីទាំងពីររបស់ផ្ទះនេះក៏បានចូលរួមដែរ ។ កូនស្រីបងគេចាត់ឲ្យនៅក្នុងក្រុមស្លៀកសម្លៀកបំពាក់ថៃភាគខាងត្បួង ចំណែកូនស្រីប្អូនស្ថិតក្នុងក្រុមផ្ដល់កម្លាំងចិត្ដពណ៌ក្រហម ។ នៅមុនថ្ងៃនៃពិធីសិស្សានុស្សិសទាំងអស់ត្រូវបានគេបង្ហាត់ឲ្យដឹងអំពីរបៀបរបបនិងអ្វីដែលត្រូវធ្វើក្នុងក្រុម ពោលគឺវិន័យក្នុងក្រុម ។ សំខាន់គឺការស្លៀកពាក់ ដែលនេះអាចបន្ទុកមួយសម្រាប់ឪពុកម្ដាយឬអាណាព្យាបាលសិស្ស ព្រោះសិស្សម្នាក់ៗត្រូវមានសម្លៀកបំពាក់ដែលសាលាជួលមកឲ្យដោយខាងសិស្សជាអ្នកចេញថ្លៃជួល ។ ក្មេងៗពិតជាសប្បាយនឹងពិធីនេះណាស់ ជិតដល់ថ្ងៃពិធី ពួកគេគេងមិនលក់ ច្រួលច្រាល (ក្មេងផ្ទះនេះ) ចំណែកក្មេងថៃដទៃទៀតក៏មិនខុសគ្នាដែរមើលទៅ ។
ម្ចាស់ផ្ទះយល់ថា កីឡាពណ៌នេះមិនមែនកើតឡើងដំបូងនៅក្នុងប្រទេសថៃទេ ប្រហែលជាថៃចម្លងមកពីបរទេស ។
ប្រសិនបើខ្មែរយើងមានរៀបចំបែបនេះដែរ សម្លៀកបំពាក់ស្រុកយើងប្រាកដជាស្អាត សំបូរបែបមិនចាញ់ស្រុកគេប៉ុន្មានទេ ។
8 Dec
ផ្ទះខ្ញុំអាយុមួយឆ្នាំហើយ
ធ្មេចបើក ៗ រយៈពេលមួយឆ្នាំបានកន្លងផុតទៅយ៉ាងរហ័ស នេះគឺជាខួបមួយឆ្នាំនៃការបង្កើតប្លក vsthea(somada) ដែលមានរូបផ្ការំដួលដែលជាផ្កាប្រចាំជាតិខ្មែរ តំណាងឲ្យប្លករបស់នាងខ្ញុំ ។ រយៈពេលមួយឆ្នាំនៃការបង្ហាញខ្លួនក្នុងភូមិwordpress នេះបានធ្វើឲ្យ ខ្ញុំទទួល បាននូវចំណេះដឹងជាច្រើនតាមប្លកផ្សេង ៗ របស់អ្នកភូមិយើង ។ អ្វីដែលធ្វើឲ្យខ្ញុំសប្បាយចិត្ត ព្រមទាំង មានអារម្មណ៍កក់ក្តៅជានិច្ច នោះគឺការរាក់ទាក់ និង ការចូលរួមបញ្ចេញមតិយោបល់របស់បងប្អូនដែល ជាជនជាតិខ្មែរ នៅតាមបណ្តាប្រទេសផ្សេង ក៏ដូចជាអ្នកដែលកំពុងរស់នៅក្នុងប្រទេស ។
នាពេលនេះនាងខ្ញុំក៏សូមថ្លៃងអំណរគុណចំពោះបងប្អូនទាំងអស់ ដែលតែងតែឆ្លៀតពេលដ៏មមាញឹកចូលមកលេងប្លករបស់ខ្ញុំ ហើយក៏សូមថ្លែងអំណរគុណចំពោះអ្នកភូមិយើងដែលបានចែករំលែកនូវចំណេះដឹងល្អ ៗ ក៏ដូចជាបទពិសោធន៍ថ្មី ៗ សម្រាប់កូនខ្មែរគ្រប់រូប ។ ហើយក៏សូមអរគុណចំពោះការគាំទ្រនិងផ្តល់កម្លាំងចិត្តរបស់ស្វាមីជាទីស្រឡាញ់ ដែលជួយឲ្យខ្ញុំមានឱកាសបានស្គាល់បងប្អូនអ្នកភូមិwordpress ទាំងអស់ ។
រយៈពេលមួយឆ្នាំនេះនាងខ្ញុំបានសរសេរអត្ថបទផ្សេង ៗគិតមកដល់ថ្ងៃនេះ គឺមានចំនួន ៦៨ អត្ថបទ ព្រមទាំងទទួលភ្ញៀវបានចំនួន ៩៧៦៨ នាក់ ។
សូមជូនពរឲ្យអ្នកភូមិយើងជួបប្រទះតែសេចក្តីសុខសំណាងល្អ នាឱកាសឆ្នាំថ្មីឆ្នាំសាកល ២០១២ ដែលនឹងឈានមកដល់នាពេលដ៏ខ្លីខាងមុខនេះ ។
7 Dec
បេះដូងខ្មែរ
មកនៅស្រុកគេយូរដែរហើយ ពេលស្រុកគេមានភ័យអាសន្ន ឬ សប្បាយ គេតែងតែមានបទចម្រៀងដែលឆ្លុះបញ្ចាំងពីបញ្ហាជីវិតពិតរបស់សង្គមគេ ។ បទចម្រៀងទាំងនោះមានដូចជាការផ្តល់កម្លាំងចិត្ត ការជួយលើកទឹកចិត្ដ បណ្ដុះគំនិតឲ្យចេះជួយគ្នាទៅវិញទៅមក ក្នុងនាមជាអ្នកមានឈាមជ័រដូចគ្នា ។ និយាយដល់រឿងនេះ ខ្ញុំក៏នឹកដល់ស្រុកយើង តើយើងមានបទចម្រៀងបែបនេះដែរទេ ? ខ្ញុំព្យាយាមរកបទដែលមានលក្ខណៈដូចខាងលើតែមិនបានជួបសោះ ហើយក៏ព្យាយាមរកតាមផ្ទះអ្នកភូមិដែលនៅក្បែរ ៗ គ្នាតែនៅតែមិនប្រទះ ឬ មួយខ្ញុំចូលមិនទាន់បានគ្រប់ផ្ទះ ព្រោះអ្នកភូមិយើងក៏ច្រើន។
ចៃដន្យអីស្រាប់តែថ្ងៃនេះបានជួបបទមួយរបស់ផលិតកម្មរស្មីហង្សមាស ដែលច្រៀងដោយលោកឈន សុវណ្ណរាជ ស្ដាប់ទៅពិតជាត្រូវចិត្ត និង ពេញចិត្តជាខ្លាំង ព្រោះខ្លឹមសារនៃបទចម្រៀងនេះគាត់បានបង្ហាញពីទឹកចិត្ត ដែលចេះជួយឈឺឆ្អាលគ្នាទៅវិញ ទៅមក របស់បងប្អូនខ្មែរយើង ស្តាប់ហើយពិតជាធ្វើឲ្យខ្ញុំមានអារម្មណ៍រំភើបមែនទែន ។ ម្យ៉ាងទៀតទំនុកចម្រៀងមានលក្ខណៈខ្មែរ ប្រហែលមិនចម្លងគេទេទៀតផង ។
តែមិនដឹងថាអ្នកភូមិយើងមានគំនិតយោបល់ដូចខ្ញុំទេ ?
សូមស្តាប់បទចម្រៀង បេះដូងខ្មែរជាមួយខ្ញុំ៖
ឬអាចទស្សនាជាលក្ខណៈខារ៉ាអូខេ សូមចុចត្រង់នេះ ។
4 Dec
ពិធីជប់លៀងរំឭកគុណបុគ្គលិកបរទេស
ដើម្បីរំឭកដល់គុណូបការៈរបស់បុគ្គលិកបរទេសដែលមកបំពេញភារកិច្ចក្នុងសាកលវិទ្យាល័យ នៅរៀងរាល់ឆ្នាំសាកលវិទ្យាល័យតែងប្រារព្ធពិធីជប់លៀងដល់បុគ្គលិកទាំងនោះ ។ នេះជាលើកទី ២ ហើយដែលម្ចាស់គេហដ្ឋាន vsthea.wordpress.com ព្រមទាំង គ្រួសារ បានចូលរួមពិធីនេះ ដែលមានឈ្មោះថា International Dinner Party ។ ពិធីនេះប្រារព្ធឡើងនៅអាហារដ្ឋានរបស់សាកលវិទ្យាល័យដែលតាំងនៅក្នុងបរិវេណ របស់សាកលវិទ្យាល័យមហាសារខាម ។ មានភ្ញៀវបរទេសប្រមាណជាង ៥០ សិបនាក់ ចូលរួម ។
vsthea 
មតិ