ការរង់ចាំ មិនមែនជារឿងស្រណុកសប្បាយទេសម្រាប់មនុស្សចិត្តក្តៅដូចជារូបខ្ញុំនេះ ។ ខ្ញុំក្តាប់ទូរស័ព្ទយ៉ាងណែន នៅក្នុងដៃ ហើយព្យាយាមផ្ទៀងស្តាប់ដោយអារម្មណ៍អន្ទះអន្ទែង ។ ដោយខ្លាចមិន ឮ សំឡេងទូរស័ព្ទរោទិ៍ ភ្នែកទាំងគូរបស់ខ្ញុំព្យាយាមសម្លឹងទូរស័ព្ទដោយមិនដាក់ភ្នែក ការដែលធ្វើបែបនេះ ព្រោះបរិយាកាសនៅក្បែរខ្ញុំគឺជាផ្សារដែលពោរពេញទៅដោយមនុស្សដើរចុះ ដើរឡើង ទៅមកគ្មានដាច់សោះ ។ សំឡេងទូរស័ព្ទបានរោទិ៍ឡើង មិនបង្អង់យូរខ្ញុំក៏ចុចទទួលភា្លម សំឡេងស្រីម្នាក់នៅ ចុងខ្សែ ម្ខាងទៀតបាននិយាយមកកាន់ខ្ញុំ ដោយយើងទាំងពីរមិនធ្លាប់ស្គាល់គ្នា ហើយ ក៏មិនបានសួរសូម្បីតែឈ្មោះរបស់គាត់ផងដែរ ។
“អាឡូ បងនៅឯណាហ្នឹង” ស្រ្តីនៅខ្សែម្ខាងទៀតបានសួរមកខ្ញុំភ្លាមៗ
“ខ្ញុំនៅខាងមុខបន្ទប់ទឹក ក្បែរធនាគារកសិករ” ខ្ញុំឆ្លើយទៅកាន់គាត់ ។ ហើយយើងក៏ចាប់ផ្តើមឆ្លើយឆ្លងគ្នាជាបន្តទៀត
-បងឈរនៅកន្លែងហ្នឹងហើយណា កុំដើរទៅណាឱ្យសោះ បន្តិចទៀតនឹងមានអ្នកទៅទទួលបងហើយ ។
+ ធ្វើម៉េចខ្ញុំស្គាល់គេទៅ ?
-បងឈរទីនោះ ហើយបន្តិចទៀតនឹងមានម៉ូតូឌុបទៅឈប់ក្បែរបង ហើយគេនឹងស៊ីញ៉ូចូលទូរស័ព្ទដៃ បង ។ បន្ទាប់មកបងឡើងជិះម៉ូតូជាមួយម្នាក់នោះទៅ ហើយកុំនិយាយអ្វីឱ្យសោះណា ប្រយ័ត្នគេ ចាប់ បាន ។
+ហើយចុះឱ្យខ្ញុំធ្វើម៉េចទៀតទៅ ?
-មិនបាច់ភ័យទេ គេមិនយកបងឯងទៅលក់ទេ ។
+សុំទោស ខ្ញុំគ្រាន់តែចង់ដឹងប៉ុណ្ណោះព្រោះខ្ញុំមិនធ្លាប់មកតាមផ្លូវនេះ ។
និយាយបានតែប៉ុណ្ណោះ ទូរស័ព្ទ ក៏ដាច់បាត់ទៅ ។ ឯខ្ញុំក៏ធ្វើអ្វី មិនកើតដែរ បានត្រឹមតែរង់ចាំដោយអន្ទះសារ ហើយដើរចុះដើរឡើងម្តុំៗ បន្ទប់ទឹកនោះឯង ។ ខ្ញុំព្យាយាមរំពៃរកមើលអ្នកដែលគេនឹងមកឌុបខ្ញុំ ដោយមិនស្គាល់សូម្បីតែអត្តសញ្ញាណរបស់អ្នកនោះសូម្បីតែបន្តិច ។
ទូរស័ព្ទបានរោទិ៍ឡើងជាលើកទីពីរ
+ អាឡូ ខ្ញុំឆ្លើយយ៉ាងរហ័សដោយមិនឱ្យគេនិយាយបានមុននោះទេ
-អាឡូបង (សំឡេងប្រុសម្នាក់បានឆ្លើយ) ឥឡូវនេះបងមិនអាចឈរនៅកន្លែងនោះបានទៀតទេ បងត្រូវប្តូរកន្លែង ហើយមកឈរចាំខ្ញុំនៅខាងមុខ 7eleven វិញ ។
+ ហ្អាម៉េចអញ្ចឹង ?
-ព្រោះនៅកន្លែងដែលបងឈរនោះមានប៉ូលីសកំពុងតែតាមដាន ។
+ អញ្ចឹងមិនអីទេ ចាំបងទៅចាំនៅខាងមុខ7eleven ក៏បានដែរ ។ តែធ្វើម៉េចបងអាចស្គាល់អូនបានទៅ ?
-ខ្ញុំពាក់អាវឆ្នូត ហើយពាក់មួក បងចាំខ្ញុំនៅកន្លែងនោះហើយណា ?
+ច៎ាស
ខ្ញុំឈររង់ចាំគេប្រហែលជា ៥ នាទី ទើបមានមនុស្សប្រុសម្នាក់អាយុប្រហែលជា ២៣ឆ្នាំជិះម៉ូតូ មកឈប់ក្បែរខ្ញុំ ដោយប្រហាក់ប្រហែលនឹងការរៀបរាប់របស់គេក្នុងទូរស័ព្ទ ហើយមិនអស់ចិត្ត ខ្ញុំទាញទូរស័ព្ទមកចុចទៅលេខរបស់គេ ដើម្បីកុំឱ្យឡើងខុសម៉ូតូ ។ ក្រោយពីការសាកល្បងចប់ ខ្ញុំក៏ឡើងជិះម៉ូតូជាមួយមនុស្សប្រុសម្នាក់នោះ ដោយមិនទាំងបានឃើញមុខរបស់គាត់ទេ ព្រោះគាត់ពាក់មួកបិទមុខជិត ខ្ញុំចំណាំតែអាវគាត់ប៉ុណ្ណោះ ។
តាមពិតទៅកន្លែងដែលខ្ញុំឈរនោះ មកកាន់កន្លែងដែលត្រូវឆ្លងចេញមកដែនដីម្ខាងទៀត ចម្ងាយមិនដល់មួយគីឡូម៉ែត្រផង តែដើម្បីបំភាន់ភ្នែកប៉ូលីស គាត់បានជិះពង្វាងចុះឡើង ៗ មួយសន្ទុះធំ ។ យើងបានមកដល់គោលដៅរបស់យើង គាត់ក៏ឈប់ម៉ូតូ ហើយនាំផ្លូវខ្ញុំទៅមុន ដោយដើរកាត់តូបមួយ ដែលគេចោះប្រឡោះល្មមតែមួយខ្លួនមនុស្សចូលបាន ខ្ញុំប្រជ្រៀតចូលតាមប្រឡោះតូចនោះ ហើយដើរលើ កូនឈើបីដើមដែលគេដាក់សម្រាប់ឆ្លងកូនអូរតូចមួយ ។ អ្នកនាំផ្លូវខ្ញុំគេដើរទៅមុនបាត់ហើយ នៅសល់តែខ្ញុំដើរទីមទាមៗលើកូនឈើទាំងបីដើមនោះទម្រាំតែដើរផុត ។ ពេលដើរនោះ ព្រលឹងខ្ញុំហាក់ដូចជា មិននៅជាប់នឹងខ្លួនទេ ខ្ញុំចេះតែគិតថា ចុះបើប៉ូលីសមកចាប់បាន តើខ្ញុំនឹងក្លាយទៅជាយ៉ាងណា ?
ដើរមកដល់មុខបន្តិច ស្រាប់តែខ្ញុំឃើញមានក្រុមមនុស្សមួយហ្វូងធំ ដែលកំពុងតែត្រៀមខ្លួនឡើងមក កាន់ប្រទេសថៃវិញ ដោយម្នាក់ៗ មានស្ពាយថង់ខោអាវ និង សម្ភារៈប្រើប្រាស់ចាំបាច់មួយចំនួន ។ មេ ខ្យល់ (អ្នកដែលនាំកម្មករចេញទៅប្រទេសមួយទៀតដើម្បីរកការងារធ្វើ) បានយកថង់ខ្មៅមួយ មកឱ្យកម្មករទាំងនោះច្រក ឥវ៉ាន់ហើយក៏មិនភ្លេចយកលុយថ្លៃថង់នោះដែរ ដោយគេគិតថង់មួយប្រហែល៣០០០ រៀល ។ អ្នកដែលច្រកឥវ៉ាន់ហើយ គេឱ្យតម្រង់ជួរ ដើម្បីដើរឡើងទៅលើទឹកដីថៃដោយមានមេខ្យល់ម្នាក់ជាអ្នកនាំ ពោលគឺមេខ្យល់ម្នាក់អាចនាំកម្មករចេញបានតែប្រាំនាក់ប៉ុណ្ណោះ ។ មេខ្យល់នឹងនាំទៅដាក់ឡាន ដែលគេបានរៀបចំទុក ។ បើតាមការស៊ើបសួរពីអ្នកនាំផ្លូវ គាត់បានឱ្យដឹងថា ខាងម្ខាងទៀតគេមានអ្នកឈរចាំរាប់ចំនួនមនុស្សចេញ និង ចូល ហើយយកលុយទៅតាមចំនួននោះ ។ ដោយខាងគេមានក្រុមសម្រាប់បើកផ្លូវឱ្យកម្មករទាំងនោះឡើងឡាន នឹងទៅមកដោយសេរីតែត្រូវបង់ថ្លៃទៅតាមការកំណត់របស់ទាំងសងខាង ។
ខ្ញុំត្រូវដើរឆ្លងកាត់មេខ្យល់ខ្មែរប្រហែលជាដប់នាក់ ក្នុងនោះខ្ញុំឃើញមានស្រីម្នាក់កំពុងដេកយោល អង្រឹង នៅទីនោះ ខ្ញុំក៏ស្មានភ្លាមបានថា ស្រ្តីនោះហើយដែលជាអ្នកទូរស័ព្ទរកខ្ញុំ ។ យើងក៏បន្ត ដំណើរ ទៅមុខទៀតជាមួយក្រុមមនុស្សមួយហ្វូង ដែលមានគោលដៅចូលមកស្រុកយើង ។ នៅអមសងខាងផ្លូវ នោះ មានព្រៃឬស្សីដែលដុះយ៉ាងក្រាស់ឃ្មឹក ព្រមទាំងអូរតូចមួយដែលខាងក្រោមនោះផងដែរ ។ តែ ដោយសារតែស្នាមដានជើងមនុស្សដែលឆ្លងកាត់ មួយថ្ងៃ ៗ រាប់ពាន់នាក់ បានប្រែក្លាយព្រៃឬស្សីទាំងនោះទៅជាផ្លូវ និងដោយមានការកាប់ឆ្ការខ្លះ ៗ ផងដែរ ដើម្បីឱ្យកម្មករទាំងនោះបានសម្រាក និង រង់ចាំ វេនដែលមេខ្យល់នឹងមកទទួល ។
ឆ្លងផុតអូរគឺមកដល់ទឹកដីយើង ។ នោះគឺជាកន្លែងដែលបន្លាដែលជាប់នឹងទ្រូងខ្ញុំបានរដកចេញខ្សាក ៗ បន្តិចម្តង ទាំងទ្រូងញ័រចំប្រប់ប្រៀបដូចជាកូនចាបដែលត្រូវទឹកភ្លៀង ។ ស្នាមញញឹមក៏ចាប់ផ្តើមផ្តុំគ្នាពេញដើមទួ្រងគិតថា នឹងរួចទុក្ខ រួចទោសនៅប៉ុន្មានជំហានខាងមុខជាមិនខាន ។
សំឡេងចេចចាច និង រត់ស្រូចុះមកវិញរបស់អ្នកដំណើរមួយក្រុមដែលនៅមុខខ្ញុំ បានធ្វើឱ្យក្តីកង្វល់របស់ខ្ញុំកើតមានជាថ្មីម្តងទៀត ។ មេខ្យល់ដែលនៅខាងក្រោម បានស្រែកសំឡុតទៅក្រុមអ្នកឆ្លងដែនទាំងនោះ ប្រៀបដូចជាសំដីមនុស្សពាល ។ គេឱ្យអ្នកឆ្លងដែនទាំងនោះរកកន្លែងលាក់ខ្លួនដោយស្ងៀមស្ងាត់បំផុត ហាមឡូឡា បើអ្នកណាឡូឡានឹងបញ្ជូនទៅឱ្យម្ខាងទៀត (…) ។
មានដំណឹងថាច្រកខាងយើងត្រូវតែបិទមួយរយៈ ហើយមិនប្រាកដថាពេលណានឹងបើកនោះទេ ព្រោះ ពេលនេះមេខ្យល់ខាងយើងកំពុងតែសម្រួលជាមួយអ្នកព័ត៌មាន ដែលតែងតែចូលមករកបាយស៊ីនៅម្ដុំនេះ ។ ខណៈនោះគេកំពុងតែចរចារគ្នាមិនទាន់ត្រូវ ព្រោះអ្នកសុំបាយដាក់តម្លៃខ្ពស់ពេក ជាហេតុធ្វើឲ្យក្រុមដែលត្រូវឡើងមកស្រុកយើងត្រូវនាំគ្នាមកអង្គុយសំកុក នៅឯបគុម្ពឬស្សី ។ យើងអង្គុយបណ្តើរទះមូសបណ្តើរ អ្នកខ្លះទាញបារីមកបង្ហុយទាំងទឹកមុខស្រងូតស្រងាត់ ។ យប់កាន់តែជ្រៅការចរចារនៅតែមិនទាន់ត្រូវគ្នាទៀត ខ្ញុំក៏លួចសួរទៅអ្នកនាំផ្លូវម្នាក់ដែលមើលទៅគាត់ជាមនុស្សចេះដឹងច្រើនជាងគេ ។ គាត់ប្រាប់ថា បងមិនបាច់បារម្ភទេ បើច្រកនេះគេចរចារមិនត្រូវគ្នាចាំគាត់នាំទៅកាន់ច្រកផ្សេងទៀត (បើតាមសំដីរបស់គាត់នៅមានច្រកជាច្រើនទៀតដែលគេធ្វើរបៀបនេះគ្រាន់តែខ្ញុំមិនដឹងថាប៉ុន្មានប៉ុណ្ណោះ?) ។ ចុះបើពួកអ្នកសុំបាយ ចុះមកដល់ទីនេះ តើពួកយើងនឹងក្លាយទៅជាយ៉ាងណា ? តែគាត់ប្រាប់ថា ពួកគេចុះមកមិនបានទេ ព្រោះទីនេះជាដីគេមិនមែនជាទឹកដីយើងទេ ដូច្នេះពួកនោះពិតជាមិនហ៊ានមកទេ ។
ដោយយប់កាន់ជ្រៅ ខ្ញុំពិបាកនឹងទ្រាំនៅទីនោះណាស់ ទើបខ្ញុំសាកទាក់ទងអ្នកនាំផ្លូវម្នាក់ទៀតដែលខ្ញុំបានទាក់ទងមុនគេបង្អស់ ឱ្យគាត់ជួយនាំខ្ញុំបានចេញមុនគេ ។ គាត់ក៏ឡើងទៅជួបជាមួយមេធំនៅខាងលើ ។ ការព្យាយាមបានសម្រេច ព្រោះគេបានចាត់ចែងឲ្យខ្ញុំបានឆ្លងមុនគេ ។ អ្នកខាងលើទូរស័ព្ទមកកាន់អ្នកក្រោម ហើយឱ្យគេនាំខ្ញុំទៅតែម្នាក់ឯង ព្រោះខ្ញុំគ្មានសម្ភារៈអ្វីច្រើនដូចអ្នកឯទៀត ខ្ញុំមានតែស្បោងតូចតូចមួយដែលស្ពាយជាប់នឹងខ្លួនតែប៉ុណ្ណោះ អាចងាយស្រួលក្នុងការចេញចូល ដោយមិនឱ្យអ្នកដទៃចាប់អារម្មណ៍បាន ។ ខ្ញុំក៏បានចេញមកដល់ទឹកដីយើងដោយសុវត្ថិភាព និង មិនមាននរណាចាប់អារម្មណ៍នឹងខ្ញុំឡើយ ។ តែនៅមានឆ្លងដែនមួយក្រុមទៀតមិនដឹងថាពួកគាត់ និង បានចេញមក ឬ យ៉ាងណានោះទេ ?
ស្ដាប់សំដីរៀបរាប់ខាងលើហើយធ្វើឲ្យអ្នកស្ដាប់ (ម្ចាស់ផ្ទះនេះ) ភ័យអរជំនួសអ្នកឆ្លងដែនយើង ។ ចេះតែគិតថាបើស្រុកយើងស្រួលបួល ងាយស្រួលរកស៊ីចិញ្ចឹមជិវិត ម្ល៉េះសមបងប្អូនខ្មែរយើង មិនបាច់រត់ចោលស្រុកទេស ប្រថុយនឹងគ្រោះថ្នាក់មកស្រុកគេអញ្ចឹងនោះទេ ។
អត្ថបទទាក់ទង ជីវិតកម្មករឆ្លងដែន
មតិ